Përdorimi i armëve kimike është ”i papranueshëm dhe nuk duhet të mbetet kurrësesi pa një kundërpërgjigjie”, deklaroi sot sekretari i përgjithshëm i NATO-s, Hans Fogh Rasmussen në përfundim të një takimi të Këshillit Atlantik, ku u shqyrtua e gjithë situata e Sirisë dhe kryesisht përdorimi i armëve kimike kundër popullsisë civile.
Ndërkohë që pak kohë më parë Kryeministri sirian, Wael al-Halqi, paralajmëroi vendet perëndimore se ”Siria do të ishte varreza e pushtuesve të huaj në rast ndërhyrjeje ushtarake”.
Këshilli i Sigurimit ndërkohë është mbledhur pa asnjë rezultat përfundimtar.
ORA 22:23: MERKEL DHE CAMERON SHPRESOJNË VENDIM TË OKB-SË
Kancelarja Angela Merkel dhe kryeministri britanik David Cameron shpresojnë një vendim të Këshillit të Sigurimit të OKB-së për t’i dhënë udhë zgjidhjes së situatës në Siri.
ORA 21:20 – LIDHJA ARABE DËNON SULMET KIMIKE TËASSAD
Ministrat e Jashtëm tëLidhjes Arabe pritet të mblidhen javën e ardhshme për një rezolutë, e cila dënon Bashar Al Assad si përgjegjësin e sulmeve kimike në Siri.
ORA 21:00 – REZOLUTA E BRITANISË HIDHET POSHTË NË KS
Rezoluta britanike për ndërhyrje ushtarake në Siri hidhet poshtë në Këshillin e Sigurimit. Ambasadorët e Kinës dhe Rusisë kanë dalë jashtë mbledhjes.
ORA 21:00- PRESIDENTËT RUS PUTIN DHE ROHANI KUNDËR SULMIT USHTARAK
Presidenti rus Vladimir Putin dhe homologu i tij iranian, Hassan Rohani edhe pse dënojnë sulmet kimike në Siri janë kundër ndërhyrjes ushtarake.
ORA 18:45 – SHBA-të U BINDËN NGA NJË TELEFONATË
Paniku i shprehur në një telefonatë i një prej gjeneralëve të ushtrisë së Assadit me njësinë ushtarake përgjegjëse për armët kimike në Siri, bindi Shtetet e Bashkuara të Amerikës se pas sulmeve të 21 gushtit qëndron regjimi i presidentit Bashar al Assad.
Kështu raporton “DailyMail”, sipas të cilës përgjimi i telefonatës është bërë nga shërbimet sekrete amerikane. Në të zyrtari i lartë ushtarak sirian, emri i të cilit nuk bëhet publik, ka kërkuar mes panikut llogari nga shefi i njësisë së armëve kimike në Siri për sulmin në fjalë.
Grupet opozitare thonë se të paktën 1300 vetë, pjesa më e madhe e të cilëve gra dhe fëmijë gjetën vdekjen në sulmet e 21 gushtit. Ata thonë se armët kimike janë përdorur edhe herë të tjera nga ushtria e Assad, por jo në përmasa të tilla.
Ndërkohë, mediat në Izrael fajësojnë Maher al-Assad, vëllai i natyralizuar i presidentit sirian Basha al-Assad, për autorësinë e sulmit. Në fakt emri i tij nuk është hera e parë që përmendet në media. Ai njihet si drejtuesi i disa njësive speciale të ushtrisë që akuzohen për disa nga masakrat më çnjerëzore që nga nisja e konfliktit të armatosur në vend.
Nga ana tjetër, për t’i paraprirë ndonjë sulmi të mundshëm me armë kimike Izraeli ka nisur të shpërndajë maskat kundragaz për popullsinë, kryesisht në zonat kufitare me Sirinë. Në Lartësitë Golan, që Izraeli mban të pushtuara që prej viti 1967, Tel Avivi ka përqendruar një numër të madh ushtarësh dhe mjetësh luftarake të përfshira në një stërvitje të gjërë si demostrim force ndaj Sirisë nëse kjo e fundit ndërmerr ndonjë sulm.
ORA 18:30 BURIME AMERIKANE: SULMET TË SHËNJESTRUAR DHE MË SHUMË SE NJËDITORE
Një raprezalje eventuale kundër Sirisë për përdorimin e armëve kimike kundër popullsisë civile ”nuk do të jetë i kufizuar në një fashë kohore njëditore”, deklaroi një burim i lartë i administratës amerikane për agjencinë informative “Bloomberg”, ndërsa në Këshillin e Sigurimit po zhvillohet një takim lidhur me projektrezolutën britanike “që autorizon përdorimin e të gjitha mekanizmave të nevojshme për mbrojtjen e popullsisë civile” siriane nga sulmet me gaz.
ORA 18: 25 AFP: BURIMET AMERIKANE: SULMET TE PASHMANGSHME
Burimet amerikane pohojnë se sulmet kundër shënjetrave ushtarake siriane brenda pak ditëve janë të pashmangshme, informon AFP.
ORA 18:20 NATO: PËRDORIMI I ARMËVE KIMIKE NUK DUHET TË MBETET PA KUNDËRPËRGJIGJE
Përdorimi i armëve kimike është ”i papranueshëm dhe nuk duhet të mbetet kurrësesi pa një kundërpërgjigjie”, deklaroi sekretari i përgjithshëm i NATO-s, Hans Fogh Rasmussen në përfundim të një takimi të Këshillit Atlantik, ku u shqyrtua e gjithë situata e Sirisë dhe kryesisht përdorimi i armëve kimike kundër popullsisë civile.
”Nuk duhet të mbetet pa marrë një kundërpërgjigjie të merituar”, theksonte kreu i aleancës ushtarake të Altantikut të Veriut
ORA 17: 58 DAMASKU: SIRIA DO TË JETË VARREZA E PUSHTUESVE TË HUAJ NË RAST SE NA SULMOJNË
Kryeministri sirian, Wael al-Halqi, ka paralajmëruar sot vendet perëndimore se ”Siria do të ishte varreza e pushtuesve të huaj në rast ndërhyrjeje ushtarake”.
“Siria (…) do t’u shkaktojë një habi të pamatë agresorëve të saj po të njëjtën mënyrë siç ka bërë gjatë luftës izraelito-arabe të tetorit të vitit 1973 dhe do të shndërrohet në varrezën e tyre”, deklaroi kryeminsitri sirian i cituar nga televizioni publik vendas, informon AFP
ORA 17: 55 IZRAELI VENDOS NË GJENDJE GATISHMËRIE NJËSITE REZERVISTE TË USHTRISË
Duket se autoritetet izraelite po përgatiten për një eventualitet sulmesh perëndimore në Siri, si kundërpërgjigje ndaj sulmeve me armëve kimike që besohet të jenë kryer nga forcat e regjimit të Assadit dhe këtë e njoftuan rrjetet televizive vendase, të cilat theksonin se ministria e Mbrojtjes ka dërguar urdhra për paraqitje në kazermë në gjendje gatishmërie të lartë për një numër të caktuar njësitesh të rezervistëve të trupave ushtarake izraelite.
”Kabineti i Mbrojtjes ka miratuar, duke pasur në qendër të vëmendjes situatën në Siri, thirrjen në kazerma për një numër të caktuar rezervistësh të disa reparteve të specializuara të trupave ushtarake”, theksonin rrjetet televizive izraelite.
TAKIM I PESË ANËTARËVE TË PËRHERSHËM TË KËSHILLIT TË SIGURIMIT MBI PROPOZIMIN BRITANIK
Ambasadorët e pesë vendeve anëtare të përhershme të Këshillit të Sigurimit, SHBA-ja, Franca, Britania e Madhe, Rusia dhe Kina u mblodhën sot në Nju Jork për të analizuar projektin britanik për zgjidhjen e situatës në Siri, bënë të ditur burime diplomatike.
Kryeministri britanik, David Cameron u shpreh sot se Londra do të paraqiste një zgjidhje që dënonte sulmin kimik të 21 gushtit në Siri. “Ne do të autorizojmë marrjen e të gjitha masave të nevojshme për mbrojtjen e popullsisë civile, duke përfshirë dhe përdorimin e forcave ushtarake”, theksoi Cameron, informon AFP.
ORA 17: 00 URDHRI PËR SULMIN KIMIK MUND TË JETË DHËNË NGA VËLLAI I PRESIDENTIT ASSAD
Urdhri për përdorimin e armëve kimike që shkaktoi më 21 gusht vdekjen e qindra civilëve në periferi të Damaskut mund të jetë dhënë nga Maher al Assad, vëllai i presidentit sirian, Bashar al Assad, sipas një zyrtari të OKB-së që monitoron konfliktet në Lindjen e Mesme.
Maher al Assad është në krye të gardës së republikës dhe kontrollon divizionin e katërt, një njësi elitare e ushtrisë siriane që sipas opozitës ka përgjegjësinë për sulmin e 21 gushtit.
“Përdorimi i gazrave vdekjeprurës mund të ketë qenë vendim i diktuar nga arroganca e Maher al Assad, më tepër se sa një lëvizje strategjike e presidentit, Bashar al Assad”, cituan burime nga OKB-ja, për agjencinë “Bloomberg
