Home Politike Politikani gjerman: Partitë shqiptare,shohin si katastrofë fitoren e kundërshtarit

Politikani gjerman: Partitë shqiptare,shohin si katastrofë fitoren e kundërshtarit

56
0

Nënkryetari i fraksionit socialdemokrat gjerman në Bundestag e president i Shoqatës së Evropës Juglindore në Gjermani, Gernot Erler mbi situatën politike në Shqipëri. Duhet së paku një besim e konsensus minimal, tha ai ne interviste për DW.
Hendeku politik mes dy partive kryesore në Shqipëri pasi KQZ shpalli fitues Bashën me numërimin e votave të hedhura gabim është më i thellë se kurrë. Situata politike veçse nuk ka qenë më e mirë që pas 2009-s. Mos kanë krijuar politikanët shqiptarë ishullin e vet të sherrit, dhe nuk i kuptojnë më sinjalet nga Evropa?
Para se të filloj të fajësoj dikë, jam shumë i trishtuar. Këto zgjedhje duhej të ishin një pikë kthese, e të çonin drejt stabilizimit, pas një krize të vazhdueshme pas zgjedhjeve të vitit 2009. Po rezultati doli shumë i ngushtë, vërtet shumë i ngushtë. Kjo çoi në një grackë të re, ku këshilla e mirë është flori dhe askush nuk e di vërtet se si të dilet nga kjo situatë. Bëhet fjalë për shumë pak vota. Por e dyshimtë është se si u gjetën votat në kutitë e gabuara. Nga ana tjetër gjendja ligjore këtu është e paqartë. Qytetarëve fillimisht iu tha se votat që janë në kutitë e gabuara janë të pavlefshme, tani ato u numëruan dhe kjo duhet sqaruar nga pikëpamja ligjore. Shpresoj që vendimi i Kolegjit Zgjedhor të sjellë më në fund qartësi për këtë çështje.
Kolegji Zgjedhor do të japë verdiktin e tij pas pak ditësh, po a besoni se palët do ta pranojnë atë? Siç dihet nga përvoja në Shqipëri nuk ekziston ndonjë besim i madh në institucionet e drejtësisë.
Unë fola për një situatë gracke. Është e qartë që nuk ka asnjë mundësi tjetër përveç sqarimit ligjor të çështjes. Më pas mund të ketë përpjekje për të bërë edhe qartësimin politik të saj. Sido që të jetë vendimi, ai do të jetë i pakënaqshëm, pavarësisht nëse njëra palë do të jetë fituese apo humbëse. Sepse edhe po qe se Kolegji Zgjedhor do ta rrëzonte rezultatin duke e lënë të vlefshëm atë të mëparshmin, që do të thoshte që Rama do të ishte fitues, edhe kjo do të ishte e pakënaqshme, kur e di që po të merreshin në konsideratë votat e hedhura gabim, do të dilte një rezultat tjetër. Në thelb pastaj duhej të niste një proces dialogu mes partive, i cili do të çonte në zgjedhje të reja. Por këtë mund ta zgjidhësh politikisht, një gjykatë nuk mund ta zgjidhë këtë.
Duket se votuesit shqiptarë i kanë parakaluar politikanët. Më 8 Maj ata votuan me pjesëmarrje të lartë e të qetë. Rezultati gati i barabartë për të dyja palët, në thelb është sinjal i votuesve për dialog. Pse nuk duan ta marrin në konsideratë politikanët shqiptarë këtë sinjal? Kokëfortësi apo papjekuri politike?
Në një pikë do t’iu jepja të drejtë. Problemi që kemi është mungesa e një gjuhe komunikuese mes aktorëve të ndryshëm politikë dhe partive të ndryshme, si edhe mungesa e një konsesusi bazë. Në thelb partitë politike në Shqipëri e vlerësojnë njëra-tjetrën me kategoritë e vlerësimit të armikut, dhe e paraqesin gjithmonë si një katastrofë të pariparueshme për vendin po qe se fiton pala tjetër ose po qe se ndodhesh në opozitë. Po qe se vazhdon një gjendje e tillë kjo është një gur i rëndë në kurriz të popullit shqiptar, një peshë e rëndë për të. Sepse është e nevojshme të kihet një konsensus minimal, një besim minimal mes palëve, si nga qeveria ashtu edhe nga opozita, ndryshe një vend nuk mund të prosperojë. Kjo situatë është vërtet shumë e ngurtësuar në Shqipëri, unë vetë shpresoja që këto zgjedhje do të na çonin një hap përpara, ka pasur një mbështetje të gjerë ndërkombëtare për këto zgjedhje. Prandaj është tragjike që rasti i Tiranës sërish hedh hije mbi politikën shqiptare.
Po partnerët ndërkombëtarë kanë kohë që e përsërisin kërkesën për dialog, ajo është kthyer në refren, por rezultati nuk ka qenë shumë shpresëdhënës, siç duket edhe pas këtyre zgjedhjeve. Duhet ndonjë mesazh edhe më i qartë?
Mesazhi ka qenë shumë i qartë, fakti që mbi 500 vëzhgues ndërkombëtarë morën pjesë aty, tregon që partnerët ndërkombëtarë duan të ndihmojnë, nuk e di sa miliona janë derdhur nga burimet ndërkombëtare për këto zgjedhje. Pra nuk ka munguar angazhimi që këto zgjedhje vërtet të ktheheshin në një pikë kthese për politikën shqiptare. Përpjekjet duhet të vazhdojnë, fillimisht duhet zgjidhur rasti i Tiranës në mënyrë paqësore, të civilizuar, dhe mbi baza ligjore. Vendimi i Kolegjit Zgjedhor këtu është shumë i rëndësishëm. Por i rëndësishëm është edhe disiplinimi i aktorëve politikë. Duhet të marrin fund fyerjet e dyanshme nga krerët e të dyja kampeve, por edhe kërcënimet e zemëruara për revolta popullore. Të dyja këto mënyra nuk e projektojnë rrugën e së ardhmes për Shqipërinë.

Qeveria vendos reduktim procedurave të inspektimeve te bizneset

Komisioni i Ekonomisë diskuton koncesionet, opozita hedh dyshime

Deputeti i opozitës Andis Harasani në Komisionin Parlamentar të Ekonomisë, hedh dyshime mbi procesin përmes të cilit qeveria po kërkon të japë me koncesion mirëmbajtjen e rrugëve. ”Kur është bërë tenderi, kush e përzgjodhi IFC-në si konsulent. Me çfarë kushtesh, sa ka qene fondi limit për këtë tender?-thotë Harasani. Harasani ngre shqetësimin, se edhe vala e re e privatizimeve që ka lajmëruar qeveria do të krijojë më shumë kosto se sa përfitime për ekonominë dhe për këtë i referohet eksperiencave të kaluara. “Ne kemi dhënë shumë vepra me koncesion dhe ajo çfarë ka ndodhur është se kontrata nuk ndiqet. Më shqetësuese është kontrata koncesionare e CEZ, që nuk ka përmbushur asnjë pikë të kontratës”, tha Harasani. Kryeministri ka lajmëruar së fundmi se qeveria do të nisë një valë të re privatizimesh duke i kaluar sektorit privat edhe pasuritë e mbetura ende në pronësi të shtetit.
Reduktim procedurave të inspektimeve te bizneset
Komisioni Parlamentar i Ekonomisë votoi në parim një projektligj, që sipas qeverisë do të reduktojë barrën dhe procedurat e inspektimeve tek bizneset. Drafti i cili është përgatitur nga Ministria e Ekonomisë, sipas qeverisë redukton numrin e inspektoriateve publike nga 33 në rreth 11 nga një për çdo ministri. Kjo sipas qeverisë do të bëjë të mundur jo vetëm uljen e kostove për biznesin, por edhe reduktimin e kohës së inspektimeve. Drafti rrit kompetencat e inspektorëve dhe ndryshe, të cilët tashmë janë ato që jo vetëm propozojnë por edhe vendosin masat ndëshkuese ndaj bizneseve që konstatohen në shkelje, ndryshe nga sa ka qenë deri tani kur masat ndëshkimore ishin kompetencë e drejtueseve të inspektoriateve.

Shehu: Drafti, mund të ndërhyhet në kontigjenca
Ministria e Financave do të ketë gati në fillim të muajit Qershor draftin e Buxhetit të Shtetit të rishikuar. Burime konfidenciale nga ky dikaster thane për se, nga niveli jo i mirë i të ardhurave, si dhe rritja e shpenzimeve gjatë 4 mujorit të parë të këtij viti, pritet që buxheti i rishikuar të rezultojë me shkurtime fondesh për disa sektorë. Ish-zëvendësministri i Financave, Sherefedin Shehu, u shpreh për RTV SCAN se, për të patur një deficit buxhetor nën kontroll, mund të ndërhyhet në fondin e kontigjencës. Sipas të dhënave paraprake të publikuara nga Ministria e Financave, totali i të ardhurave për katër muajt e parë të vitit ishte 103.7 miliardë lekë, me një rënie prej 0.7%, krahasuar me të njëjtën periudhë të vitit 2010.Shpenzimet arritën vlerën e 119.5 miliardë lekëve, me një rritje prej 13% krahasuar me një vit më parë. Kjo tendencë e të ardhurave dhe shpenzimeve solli një rritje të fortë të deficitit buxhetor, që për katër muajt e parë të vitit preku vlerën e 15.8 miliardë lekëve, ose 13 herë më shumë krahasuar me katër mujorin e parë të vitit 2010.

 

LEAVE A REPLY

Please enter your comment!
Please enter your name here