Konsumimi i dozave të larta të vitaminave B, në veçanti vitaminës B2, mund të ndihmojë në parandalimin e sulmeve të migrenës.
Përfundimi është nxjerrë nga një studim i realizuar kohë më parë, që ka hulumtuar efektin e vitaminës B2 në shpeshtësinë, kohëzgjatjen dhe intensitetin e migrenës te 23 persona të moshës nga 20 deri në 65 vjeç.
Çdo pjesëmarrës në studim ka marrë 400 miligramë riboflavinë (B2) çdo ditë për tre muaj dhe ka mbajtur një ditar ku ka shënuar numrin e sulmeve të migrenës, kohëzgjatjen e saj, intensitetin dhe përdorimin e barnave.
Sipas rezultateve të studimit, konsumimi i vitaminës B2 është lidhur me një ulje të numrit të sulmeve të migrenës nga katër në dy.
Pjesëmarrësit po ashtu kanë raportuar ulje të konsumimit të barnave, edhe pse intensiteti i dhimbjeve nuk është zvogëluar.
Konsumimi i vitaminës B2 ka rezultuar vetëm me disa efekte anësore të lehta, si barkqitje, dhimbje në abdomen dhe skuqje në fytyrë.
