Hidhet ne ere makina e drejtorit te burgut Fushe Kruje, Arben Suloj

Eshte hedhur ne ere makina e drejtorit te burgut te Fushe Krujes. Lenda plasese dyshohet te jete tritol.
Drejtori i burgut Arben Suloj ka mbetur i plagosur nga shpërthimi, por jashtë rrezikut për jetën. Policia ka filluar hetimet per shkaqet e ketij shperthimi.
Shpërthimi i automjetit tip ‘Opel’ me targa AA 654 AS ndodhi brenda Portit të Durrësit.

Drejtori i burgut të Fushë-Krujës jeton në lagjen numër 1 të qytetit bregdetar, ndërsa burime nga Policia e Durrësit sqaruan se Arben Sulo ka qenë duke shkuar në punë kur makina e tij ka shpërthyer. Të njëjtat burime thanë se Sulo ka kaluar nga brenda portit për të shmangur trafikun e orëve të mëngjesit, ndërsa ishte nisur drejt Fushë-Krujës.

Hetimet janë nisur në disa pista po kryesorja është ajo që lidhet me detyrën e Arben Suloj, si drejtor i Burgut të Fushë-Krujës, ndaj është duke u verifikuar ndonjë konflikt i mundshëm me të dënuarit.

Në momentin që ka ndodhur shpërthimi kanë qenë punonjësit e sigurisë së Portit, të cilët i kanë dhënë ndihmën e parë. Policia ka nisur marrjen e tyre në pyetje. Ndërkohë Suloj është vizituar në spital edhe nga Ministri i Mjedisit, Lefter Koka si dhe krerët e policisë së Durrësit dhe autoritetet lokale, të cilët kanë premtuar zbardhjen e plotë të këtij atentati të rëndë.

Një provë shumë e rëndësishme për zbardhjen e ngjarjes, janë kamerat e sigurisë, që pritet të hedhin dritë mbi autorët e këtij shpërthimi.

Arben Suloj ndodhet prej një viti në krye të burgut të Fushë-Krujës, ndërsa familja e tij nga Vlora është zhvendosur prej vitesh në qytetin e Durrësit.