Zbardhet mekanizmi i vjedhjes së argjendarisë në një nga qendrat tregtare në periferi të kryeqytetit. Burime policore sqarojnë se në grabitje kanë marrë pjesë pesëpersona, nga të cilët katër kanë qenë të veshur si babagjyshër të Vitit të Ri dhe personi i pestë i priste jashtë argjendarisë me makinë. Pamjet filmike të kamerave të sigurisë tregojnë katër persona të maskuar si babagjyshër, të cilët ecnin qetësisht në qendrën tregtare. Njëri prej tyre madje është ndaluar edhe nga një fëmijë i vogël, me të cilin ka luajtur për disa sekonda.
“Babagjyshërit” janë pyetur edhe nga roja private i qendrës tregtare, për të ditur se me çfarë aktivitetesh merreshin në qendrën tregtare. Më pas, grupi i babagjyshërve ka hyrë në argjendari dhe pasi kanë uruar shitësen për Krishtlindjen, i kanë drejtuar asaj armën. “Më thanë Gëzuar dhe më drejtuan armët. U tremba pa masë dhe po shikoja rreth e rrotull se çfarë kisha ndonjë gjë aty, por më pas u dhashë të gjitha ato që më kërkuan. Ata i futën në disa çanta të zeza që i nxorën nga bluza. Armët e zjarrit i mbanin brenda xhaketës së kuqe, të futur poshtë pantallonave. Zgjati vetëm dy minuta”, ka bërë me dije shitësja. Sipas policisë, njëri prej babagjyshërve ka qenë tek dera e argjendarisë, dy të tjerët mbushnin thasët me florinjtë dhe bizhuteritë që ndodheshin aty, ndërsa i katërti mbante nën kërcënim shitësen. Sipas policisë, e gjithë sasia e mallit që kanë grabitur katër babagjyshërit shkon rreth 150-200 mijë euro.
Pas ngjarjes, autorët janë larguar me makinën që i priste jashtë qendrës tregtare në drejtim të Lanabregasit. Rrugës kanë shkëmbyer zjarr edhe me policinë. Më pas, uniformat blu kanë gjetur automjetin të braktisur dhe të djegur në periferi të Tiranës, ndërsa mëngjesin e ditës së djeshme në një kosh mbeturinash në Sanatorium janë gjetur dy armë kallashnikovë, një palë xhinse dhe një bluzë, të cilat dyshohen se janë të grabitësve.
Policia ka pohuar se një nga armët ka qenë bosh, ndërsa tek tjetra ndodheshin pesë fishekë, por pa mundur të gjejnë dot gjurma gishtërinjsh, sepse grabitësit kanë pasur doreza. Ndërkohë,policia ka shoqëruar 14 persona për këtë ngjarje, mes të cilëve edhe drejtuesin e mjetit, Xhelil A., 51 vjeç, me të cilin janë larguar babagjyshërit. Ky i fundit është shprehur se ia kishin vjedhur makinën prej afro një jave, por policia dyshon se ai mund të ketë lidhje me ngjarjen, pasi nuk ka bërë denoncim për vjedhjen e automjetit.
