TIRANE – Gjatë aksioneve vullnetare për pastrimin e Tiranës, kryebashkiaku Erion Veliaj lançoi dje nga komuna e Farkës projektin pilot, “punësimi në komunitet”. Qytetari i parë i Tiranës i bëri thirrje të gjithë personave që marrin ndihmë ekonomike nga shteti, që të mos ngurrojnë t’i bashkohen aksioneve vullnetare për pastrimin e Tiranës, pasi më pas do të kenë mundësi të marrin rrogë të plotë pranë ndërmarrjes së pastrimit dhe gjelbërimit.
“Kemi ftuar qytetarët që marrin ndihmë ekonomike të përfitojnë nga bujaria e taksapaguesve shqiptarë nëpërmjet ndihmës ekonomike dhe për herë të parë u kemi kërkuar që edhe të vijnë e të japin një dorë në komunitet, të japin disa orë pune”, deklaroi Veliaj.
Ai tha se ky projekt do të vijojë dhe ambicia e Bashkisë është që, për të gjithë njerëzit që janë me ndihmë ekonomike dhe kanë dëshirë të punojnë, të rekrutohen më pas me një rrogë të plotë në ndërmarrjet e pastrimit dhe gjelbërimit.
“Për njerëzit nevojtarë, që nuk ia përtojnë punës, ne duhet t’u ofrojmë mundësinë e një pune, ndaj edhe ju falenderoj që edhe pilotimi që bëmë sot (dje) me punësimin në komunitet, me disa orë punë vullnetare të atyre që marrin ndihmë ekonomike, deri tani rezulton një eksperiment i suksesshëm”, tha Kryetari i Bashkisë së Tiranës.
Ndërkaq, nismës së Bashkisë së Tiranës për pastrimin e qytetit, iu përgjigjën dje mijëra kryeqytetas. Qytetarë të shumtë u bënë pjesë e shtabeve të ngritura në të gjitha njësitë administrative të Tiranës.
Pjesë e këtij aksioni ishte edhe Kryetari i Bashkisë së Tiranës, Erion Veliaj, i cili fillimisht zgjodhi njësinë e Farkës, e më pas njësitë nr. 4 dhe nr. 8, për të dhënë kontributin e tij në pastrimin e zonës. Në një prononcim për mediat, pas mbylljes së aksioneve në këto njësi, Veliaj falenderoi të gjithë qytetarët që iu bashkuan thirrjes së Bashkisë së Tiranës, duke e vlerësuar aksionin e djeshëm si një përgjigje pro pastërtisë dhe kundër zhulit.
“Tirana sot do të ngryset shumë më e pastër se ç’u gdhi, por kjo nuk mjafton. Kjo është arsyeja pse dje në Këshillin Bashkiak kemi shumëfishuar gjobat dhe dëmshpërblimet që duhet të paguajnë ata të cilët i shkaktojnë dëme qytetit tonë”, deklaroi Veliaj. Ai tha se beson te një qytet ku 99% e qytetarëve nuk duhet të paguajnë çmimin për 1% të atyre që ndotin dhe në një qytet që duhet të përdorë të gjitha mjetet që ka në dispozicion, edhe gjobat, edhe kompanitë e pastrimit, por edhe aksionet vullnetare.
Pasi iu bashkua vullnetarëve të njësisë nr. 8, në shkollën “Misto Mame”, kryetari i Bashkisë së Tiranës theksoi se puna është ndarë me disa prioritete.
“Në njësinë nr. 8, fokusi është te qendrat arsimore dhe një pjesë e madhe e aksionit ka ndodhur nëpër kopshte, çerdhe dhe rreth e rrotull shkollave, njësoj si pastrimi kryem pas shkollës ‘Misto Mame’ me lëvizjen e inerteve, duke i dhënë më shumë frymëmarrje zonës”, sqaroi Veliaj.
Aksioni për pastrimin e Tiranës u mbështet dje edhe nga ambasadat e huaja në Shqipëri, ushtria shqiptare, Policia e Shtetit, disa nga gratë që vuajnë dënimin në burgun e Tiranës, organizatat ndërkombëtare dhe ato shqiptare, si dhe bizneset vendase dhe grupe të ndryshme të rinjsh vullnetarë.
