Home Aktualitet Trikala: arratisen 5 shqiptare nga burgu

Trikala: arratisen 5 shqiptare nga burgu

703
0

burgu-trikalaTrazira me armë kanë ndodhur gjatë natës në burgun e Trikalas, ku për pasojë 2 oficerë të burgut janë plagosur dhe 5 të dënuar janë arratisur.

Situata gjatë natës në burg ka qenë tepër e vështirë, pasi një grup i armatosur ka sulmuar nga jashtë, ndërkohë që të shtëna janë dëgjuar edhe nga brenda burgut.

Për pasojë 2 oficerë, 37 dhe 40 vjeç janë plagosur, njëri prej tyre rëndë. Ata janë dërguar në spital, ku iu janë nënshtruar operacioneve dhe janë nën kujdes intensiv mjekësor.

Ngjarja filloi mbrëmë, kur dy furgona iu afruan burgut dhe personat që gjendeshin në to, qëlluan mbi oficerët e kullës së vrojtimit. Nga ana tjetër, një grup të dënuarish nga krahu C, ku ndodhen të burgosurit shqiptarë, kanë prerë me sharrë hekurat e qelisë dhe kanë dalë në tarracë duke qëlluar me armë.

Nuk dihet ende sesi janë futur armët në mjediset e burgut, por sipas disa informacioneve, kallashnikovët mund të jenë futur në burg, ditën e tentativës për arratisje të të dënuarit Panajotis Vlastos, në 24 shkurt.

Sipas informacioneve të para, të dënuarit e arratisur janë shqiptarë, ndërkohë që policia po bën kërkime për kapjen e tyre në zonën rreth burgut, por disa burime flasin për më shumë se 5 të arratisur. Një i dënuar nga Argjentina u kap gjatë tentativës për arratisje dhe po merret në pyetje. Policia është informuar nga zyrtarët e burgut dhe ka ngritur postblloqe në zonë për të identifikuar autorët, që ishin në furgona.

Situata është normalizuar disi në orët e para të mëngjesit nga ndërhyrja e forcave EKAM nga Athina e Selaniku, dhe ka filluar inspektimi për numërimin e të dënuarve në burg.

Zyrtari i lartë i Ministrisë së Drejtësisë u shpreh se “jemi sulmuar nga krimi i organizuar” dhe tha se i dënuari Panajotis Vlastos është burgosur në krahun A e burgut, kur u pyet nëse ai ishte në mesin e të burgosurve të cilët u përpoqën t’i shpëtojnë.

Kjo ngjarje ndodh vetëm një muaj pas tentativës për arratisje me helikopter po nga ky burg, e të dënuarit Panajotis Vlastos, kur helikopteri që do ta merrte, u qëllua nga rojet e burgut dhe nuk arriti të ngrihej, ndërsa i dënuari ra nga shkallët e tij. Vlerësimet e policisë flasin edhe për një “hakmarrje” nga bashkëpunëtorët e Vlastos, që me aktin e natës së kaluar u përpoqën për një arratisje në masë.

Vetëm një javë më parë një tjetër tentativë arratisjeje u krye nga i dënuari shqiptar Alket Rizai, në burgun e Malandrinos.

LEAVE A REPLY

Please enter your comment!
Please enter your name here