Një automjet me targa italiane është hedhur në erë rreth orës 22.00 të mbrëmjes së djeshme në zonën e Liqenit Artificial pranë Kopshtit Zoologjik.
Nga të dhënat e para mësohet se mjetit tip “Opel” me targa italiane të paregjistruara i është vendosur një sasi prej 100 gr lënde eksplozive, mendohet e llojit C4.
Makina me targa GR 31 97 94 ishte parkuar pranë Kopshtit Zoologjik, dhe mendohet se sasia e eksplozivit ishte vendosur në pjesën e prapakolpit.
Shpërthimi shkaktoi dëme materiale, por jo në njerëz.
MERRET NE PYETJE BIZNESMENI ITALIAN
Makina ka qenë e parkuar prej gati një muaji dhe pronari i saj mendohet se është një biznesmen italian, i cili është marrë në pyetje nga Policia. Ekspertët e hetimit nga Policia dhe Prokuroria rrethuan zonën dhe nisën veprimet hetimore.
Policia mendon se ka qenë atentat për të trembur personin, ku është vendosur lënda eksplozive e jo për ta eleminuar atë. Vetëm dy javë më parë, një tjetër makinë me targa italiane u hodh në erë në rrugën e Kavajës. Në zonën në afërsi të Liqenit Artificial ka pasur edhe raste të tjera të vendosjes së lëndës eksplozive në automjete, siç është ai i 23 shtatorit 2013 kur iu vendos lëndë plasëse automjetit të ndërtuesit Arben Xhaferri.
