Një hartë e publikuar nga revista gjermane « Der Spiegel » tregon përmasat e vërteta – të frikshme – që kishte marrë përgjimi i personaliteteve më të fuqishme të botës nga ana e organeve amerikane të inteligjencës.
Kjo hartë, pas publikimit, u zëvendësua më pas nga një hartë tjetër, e censuruar, por « Spiegel » arriti të pasqyrojë edhe ndryshimin mes tyre.
Në hartë pasqyrohet një rrjet i gjerë prej 80 selish të agjencisë amerikane « Special Collection Service » (SCS), aktiviteti i së cilës ishte shumë i fshehtë. Ajo ishte krijuar nga CIA dhe Agjencia e Sigurisë Kombëtare e SHBA për të siguruar përgjime me anë të teknologjisë më moderne në të katër anët e botës.
Deri para se ta zbulonte ish-kontraktori i arratisur i CIA-s Eduard Snouden, aktiviteti i saj gati nuk njihej, pasi agjencia në fjalë përdor metoda krejtësisht ilegale për të siguruar materialin e kërkuar. Bujë veçanërisht bëri fakti që nën përgjim ishin deri celulari i kancelaresd gjermane Angela Merkel, ndonëse Uashingtoni zyrtar refuzon ta pranojë një gjë të tillë.
Në gjirin e agjencisë super-sekrete janë ekspertë të dekodimit të transmetimeve elektronike, sidomos atyre që janë të mbrojtura nga ndërhyrjet e jashtme.
Në hartën e « Spiegel »-it përfshihen një numër vendesh, ku spikat Beogradi, si një nga pikat më të nxehta të botës, që pasohet nga Prishtina, si vend ku ekziston një staf i agjencisë në terren dhe shumë qendra të tjera botërore.
Ndërkohë, Tirana konsiderohet si një qendër « në ngrirje », pra në pritje të aktivitetit.
Pas zbulimit të aktivitetit në fjalë dhe pas reagimeve individuale të autoriteteve të shteteve europiane të përgjuar nga SCS, nuk vonoi reagimi i Bashkimit Europian. Gjatë mbledhjes në Këshillit Europian, e cila kishte në axhendë dixhitalizimin, duke diskutuar edhe për skandalin e përgjimeve, 28-të liderët e vendeve europiane kanë pranuar që Franca dhe Gjermania, në emër të Bashkimit Europian dhe të shteteve të tjera, duhet të gjejnë një gjuhë të përbashkët me Shtetet e Bashkuara të Amerikës. Nëpërmjet këtij dialogu, duhet të vendosen disa rregulla të përbashkëta, për aktivitetin e inteligjencës amerikane, brenda fundit të këtij viti.
“Franca dhe Gjermania do të ndërmarrin iniciativën ta diskutojnë deri në fund me SHBA problemin e shërbimeve sekrete dhe vendet e tjera të BE-së janë gjithashtu të ftuar t’i bashkohen asaj” deklaroi presidenti i Këshillit të Evropës, Herman Van Rompuy, që pranoi shqetësimet në rritje mbi zbulimet e fundit.
