Vendimi u mor dje nga Këshilli Administrativ i ISKSH-së. Sipas tij rriten deri në 9% pagat e punonjësve të qendrave shëndetësore nga skema e sigurimeve të kujdesit shëndetësor. Rreth 6% është shtesa për spitalet e rretheve. Ajo shkon deri në 10% për Qendrën Spitalore Universitare “Nënë Tereza”, Tiranë. “Rritja më e lartë është parashikuar për mjekët, të cilët mbulojnë zonat qendrore, paga e të cilëve nga 46 mijë lekë, bëhen 50 mijë lekë. Për mjekët që mbulojnë zonat fushore, paga shkon nga 54 në 57 mijë lekë, ndërsa mjekët që mbulojnë shërbimin në zonat e thella malore, do të paguhen me 80 mijë lekë, nga 78 mijë që ishte më parë. Në total për shërbimin parësor, përfitojnë rritje page rreth 9300 punonjës dhe kjo rritje nis që nga data 1 korrik 2010”, u shpreh dje drejtoresha e ISKSH-së, Elvana Hana. Gjithashtu, Këshilli Administrativ i ISKSH-së, vendosi edhe rritjen e pagave për mjekët specialistë. Kështu, rritja e pagës mujore bruto për mjekët specialistë me vjetërsi pune mbi 25 vjet varion nga 49.000 lekë në 52.000 lekë. Nga kjo rritje përfitojnë rreth 300 mjekë specialistë në Tiranë. Kështu, paga mesatare për mjekët e familjes bëhet nga rreth 50.000 mijë lekë në zonat qendrore, deri në 80.000 lekë të reja në zonat e thella. Rritje kanë pasur edhe pagat e infermierëve të Parësorit. Nga 1 korriku pagat e infermierëve me rritjen e përfituar arrijnë nga 34 mijë në 40 mijë lekë sipas kategorive. Efektet financiare mbulohen nga buxheti i miratuar për shërbimin e kujdesit shëndetësor parësor. Zbatimi i ndryshimit të pagave fillon nga data 1 korrik 2010.Ministri i Shëndetësisë, Petrit Vasili, e cilësoi këtë rritje si mjaft domethënëse.” Aq më tepër po të shohim kushtet e rajonit ku jo vetëm nuk ka pasur rritje pagash, por madje ka pasur kufizime”, tha Vasili. Në zbatim të vendimit të Qeverisë, janë rritur edhe pagat e spitaleve për mjekët dhe infermierët. Për mjekët e QSUT, materniteteve nr.1 dhe nr.2 dhe Sanatoriumit, është bërë deri në 10 % krahasuar me pagën aktuale:
Për mjekët e QSUT, mesatarisht ishte 54.100 lekë, bëhet 59.100 lekë ose shtohet 5.000 lekë në muaj. Për mjekët e spitaleve të tjera mesatarisht ishte 51.000 lekë, bëhet 54.000 lekë ose shtohet 3.000 lekë. Për infermierët e QSUT ishte 39.000 lekë, behet 41.000 lekë ose shtohet 2.000 lekë në muaj. Për infermierët e spitaleve të tjera ishte 37.000 lekë, bëhet 39.000 lekë ose shtohet 2.000 lekë në muaj. Vendimi i Këshillit Administrativ të ISKSH-së përfshin edhe spitalin e Durrësit. Pagat për mjekët e spitalit e këtij spitali rriten mesatarisht nga 54.000 lekë në 57.000 lekë.
Kush përfiton
Nga rritjet e pagave në shërbimin spitalor përfitojnë rreth 11.888 punonjës, nga të cilët rreth 1700 mjekë, rreth 8000 infermierë e sanitare dhe rreth 2100 punonjës të tjerë të administratës dhe sektorëve mbështetës. Efektet e rritjes në total për paga, sigurime shoqërore e shëndetësore, arrijnë në rreth 400 milionë lekë. Për të bërë të mundur realizimin e këtyre pagesave, do të përdoret rezerva e ISKSH nga buxheti i shërbimit spitalor. Fondet për shërbimin spitalor përballohen nga buxheti i vitit 2010 i ISKSH-së, i parashikuar për këtë shërbim.
Shtesat në pagë
Rriten nga data 1 korrik
9% pagat e punonjësve të qendrave shëndetësore
6% është shtesa për spitalet e rretheve.
10% për mjekët e Qendrës Spitalore Universitare
Mjekët e parësorit:
Në zonat qendrore
Nga 46 mijë lekë, bëhen 50 mijë lekë
Zonat fushore
nga 54, bëhen 57 mijë lekë
Në zonat e thella malore
nga 78 mijë lekë, bëhen 80 mijë lekë
Përfitojnë 9300 punonjës
Mjekët specialistë:
me vjetërsi pune mbi 25 vjet
nga 49.000 lekë në 52.000 lekë
Përfitojnë 300 mjekë në Tiranë
Infermierët
Nga 34 mijë në 40 mijë lekë, sipas kategorive
