Persona ende të paidentifikuar i kanë vënë flakën makinës së një taksisti në Kuçovë, e cila ndodhej e parkuar para pallatit te tij. Mësohet se fillimisht ata e kanë lyer makinën me benzinë dhe më pas i kanë vënë flakën nën breshërinë e automatikut.
Ngjarja është shënuar gjatë mbrëmjes së djeshme. Pasi makina është përfshirë nga flakët, të ndihmuar edhe nga errësira, autorët janë larguar nga vendi i ngjarjes. Makina,tip Benz Mercedes Elegancë,me targa AA 113,në pronësi të shtetasit Vangjel Greku, është shkrumbuar tërësisht.
Në vendngjarje kanë shkuar forcat e policisë,të cilët nuk kanë konfirmuar asnjë pistë hetimi dhe nuk kanë ende një emër të dyshuar për këtë ngjarje të rëndë. Pronari i automjetit punonte si taksist nga Kuçova në Athinë prej disa vitesh. Burime nga vendi i ngjarjes pohojnë se ngjarja mund të ketë ndodhur për konflikte të vjetra mes familjes së taksistit dhe personave të tjerë.
