Shqipëria vazhdon që të thyejë rekorde të njëpasnjëshme duke u kthyer në një uragan në renditjen e FIFA-s për këtë vit. Në renditjen e publikuar për muajin Qershor nga institucioni më i lartë i futbollit botëror, Shqipëria fiton edhe 5 vende duke u ngjitur në vendin e 38-të.
Për muajin Maj, Shqipëria u pozicionua në vendin e 43, por edhe pse nuk luajti asnjë ndeshje këtë muaj, përsëri siguroi një ngjitje tjetër. Kjo është hera e parë që kuqezinjtë ngjiten në këtë pozicion.
Në klasifikimin e fundit arritje të madhe në klasifikimin e FIFA-s ka edhe për Belgjikën që arrin pikën më të lartë, vendin e 12-të, Bosnja në vendin 15 dhe Mali që ngjitet në vendin 23. Katër vendet e para mbeten të pandryshuara me Spanjën në krye, që ndiqet nga Gjermania, Argjentina dhe Kroacia.
Holanda e pesta në tabelën e FIFA-s, e pasuar nga Portugalia, Kolumbia, Italia, Anglia, Ekuadori dhe Rusia. Në rast fitoreje kundër Norvegjisë të premten, Shqipëria mund të ngjitet në pozitën e 29-të.
Kundërshtarët e Shqipërisë:
14. Zvicra
22. Norvegjia
55. Sllovenia
61. Islanda
122. Qipro
