Home Aktualitet Shperblehen me nje page shtese policet qe arrestuan Xhuvanin

Shperblehen me nje page shtese policet qe arrestuan Xhuvanin

83
0

policiShpërblehen punonjësit e policisë që arritën të vënë në pranga dy autorët e dyshuar të vrasjes së katërfishtë në lokalin “Ante Grand” mëngjesin e së martës pranë Rrugës së Elbasanit në kryeqytet. Burime pranë radhëve të policisë bëjnë me dije se ditën e djeshme, kreu i Drejtorisë së Policisë së Tiranës, Ardian Çipa, bashkë me nëndrejtorin e Sektorit të Krimeve të Rënda në këtë drejtori, Rebani Jaupi, kanë vizituar ambientet e komisariatit numër 1 në kryeqytet për të falenderuar nga afër efektivët e policisë që morën pjesë në aksionin për kapjen e autorëve të dyshuar të krimit të rëndë ku u vranë katër persona. Burime nga uniformat blu sqarojnë se gjatë fjalës së tij Çipa ka falenderuar të gjithë punonjësit e patrullës së këtij komisariatit, duke e cilësuar si një punë të jashtëzakonshme kapjen e autorëve, por duke u ndalur kryesisht te dy efektivët që arritën të neutralizonin autorin kryesor të masakrës, 25-vjeçarin Kostandin Xhuvani dhe shokun e tij të ngushtë, Erald Sidën. Numri një i Policisë së Tiranës u ka premtuar atyre një shpërblim monetar deri në masën e një rroge mujore. Përveç kësaj, kreu i uniformave blu për kryeqytetin u ka thënë dy efektivëve të policisë që në bazë të gradës që ata kanë, janë të mirëpritur që nëse kanë dëshirë të punësohen pranë Drejtorisë së Policisë së Tiranës.

Arrestimi
Gjatë momentit të arrestimit rreth 70 metra larg lokalit të natës ku u vranë katër personat, Xhuvani i ka drejtuar efektivit të policisë armën me të cilën kishte bërë krimin e rëndë. Të paktën kjo ka qenë dëshmia e punonjësit të policisë që ka bërë të mundur arrestimin e djalit të ish-deputetes së PS-së, Luiza Xhuvani. “Gazeta Shqiptare” ka arritur të sigurojë detaje të kësaj dëshmie, ku ajo që bie në sy është fakti se efektivi i policisë së komisariatit numër 1 ka rrezikuar jetën e tij për të neutralizuar Kostandin Xhuvanin. “Gjatë kohës që vraponte thërriste: “Po më preke me dorë, më ke borxh jetën, sepse unë jam Kostandin Xhuvani”. Në një moment kur unë iu afrova, ai më drejtoi armën dhe e shkrepi, por fatmirësisht arma ishte bosh. Në këtë moment unë kam qëlluar në ajër dhe Xhuvani ka hedhur në tokë armën. Arrita ta kapja dhe kur po i vija prangat më tha: “Do të të laj në flori. Do të jap çfarë të duash, vetëm më lër të iki, sepse më mbyllet jeta”, mësohet të jetë shprehur efektivi i policisë që ka vënë në pranga të riun e dyshuar si autorin kryesor të vrasjes së katër personave në lokalin e natës pranë Fakultetit Ekonomik mëngjesin e së martës. Burime nga uniformat blu sqarojnë se momenti i ndjekjes dhe arrestimit të Xhuvanit nga efektivi i policisë së komisariatit numër 1 është kapur edhe nga kamerat e sigurisë të objekteve që ndodhen pranë vendit të ngjarjes, të cilat janë sekuestruar dhe po verifikohen të gjitha deklaratat që janë dhënë deri tani nëse kanë përputhje me atë që shfaqet te pamjet filmike apo jo.

Ngjarja
Mëngjesin e së martës në lokalin “Ante Grand”, pas një konflikti për motive çasti mbetën të vrarë 19-vjeçari Arbër Demiraj, djali i ish-prokurorit Skënder Demiraj, 36-vjeçari Edison Jaho, ish-truproja i Rezart Taçit, i cili është qëlluar më shumë se tri herë në kraharor dhe në kokë, 38-vjeçari Enea Xhaj, lindur në Berat dhe banues në Tiranë, si edhe 53-vjeçari italian Giaampaolo Azzola, i cili nuk ka pasur lidhje me ngjarjen. Pak minuta më vonë, forcat e policisë të komisariatit numër 1 në kryeqytet kanë vënë në pranga tre autorët e dyshuar të ngjarjes dhe më konkretisht 25-vjeçarin,Konstandin Xhuvani, 24-vjeçarin Erald Sida dhe 19-vjeçarin Albano Ballçaj, i cili u la i lirë më vonë, pasi u vërtetua se nuk kishte lidhje fare me krimin dhe se ishte i afërmi i Demirajt.

Previous articleRama ne Serbi, masa teper te rrepta sigurie
Next articleNoizy aksidentohet me makine

LEAVE A REPLY

Please enter your comment!
Please enter your name here