Nga kafazi i hekurt, ku i është komunikuar masa e sigurisë “arrest me burg” Renato Milloshi ka treguar për momentet e fundit para ekzekutimit të Elton Çiçës.
Sipas tij, makina e krimit, nga e cila Alia ekzekutoi Çiçën ishte blere prej tij, por paratë i kishte paguar Jani Alia.
“Jani Alia më kërkoi që të blija një makinë në emrin tim. Paratë e makinës i pagoi ai. Nuk e mbaj mend personin që e shiti makinën. Atë natë e shoqërova deri në Bllok, pastaj shkova në shtëpi”- ka thënë ai.
Ai shtoi më tej se vetëm 3 ditë më vonë kishte mësuar nga lajmet për vrasjen e Elton Çiçës. “U frikësova kur pashë mjetin në pamje. Por une nuk kam marre pjese ne vrasje, kam qene ne shtepi”- ka thene ai.
Në polici ditën e djeshme Renato Milloshi ka dhënë dëshminë lidhur me vrasjen e Elton Çiços. Ai është shprehur se nuk ka pasur dijeni për vrasjen e tij dhe se ishte në dijeni të konfliktit mes Janit dhe Eltonit.
‘Nuk kam pasur lidhje me vrasje e Elton Çiços. Unë nuk kam marrë pjesë në vrasje. Isha në dijeni për konfliktin mes Janit dhe Eltonit. Unë kam vënë ne dispozicion vetëm makinën. Unë jam i rënduar nga ana psikologjike, kërkoj mjek ”, tha Milloshi.
Dorezimi
Renato Milloshi është vetëdorëzuar në Drejtorinë e Policisë së Tiranës. “Panorama” shkruan se vetëdorëzimi, siç thanë burimet zyrtare të Policisë, ka ndodhur pas dhjetë ditësh negociata me të kërkuarin, avokatin dhe familjarët e tij.
“Pasi ka shpjeguar pozicionin e tij se nuk është autor direkt në ngjarje, është vetëdorëzuar”, thanë burimet e Policisë.
Zyrtarisht nga Policia e Tiranës thuhet se 36- vjeçari Renato Milloshi u paraqit mbrëmë me vullnetin e tij në polici bashkë me avokatin. Ai mësohet se ka qenë jashtë Shqipërisë deri një muaj më parë, kur është rikthyer në vendin tonë.
“Pas ngjarjes jam fshehur në periferi të Tiranës ku kam jetuar në banesa të ndryshme. Me Jani Aliajn nuk kam kontaktuar. Kam dëgjuar që ka ikur jashtë vendit”,- ka rrëfyer shkurt Milloshi.
Gjatë dhjetë ditëve të fundit, avokati i Renato Milloshit mësohet se ka hyrë në kontakt me Policinë dhe ka negociuar vetëdorëzimin e të riut. Emri i Renato Milloshit si i dyshuar për ngjarjen u bë publik rreth një muaj pas vrasjes së Elton Çiçës, nga shtetasi Jani Aliaj.
Bazuar në provat e gjetura në vendin e ngjarjes, nga pamjet e kamerave dhe nga një sërë informacionesh të tjera, Policia dhe Prokuroria akuzuan Renato Milloshin si ndihmës në ngjarje.
Më konkretisht, sipas Policisë, Milloshi akuzohet se ka drejtuar makinën tip “Ford” me ngjyrë të zezë, me të cilën Jani Aliaj ka lëvizur natën e vrasjes së Elton Çiçës në Tiranë. Shpallja në kërkim e Renato Milloshit u bë pikërisht pas identifikimit të makinës nga kamerat e sigurisë.
Elton Çiça u vra me dy plumba nga një person që hyri në lokalin “De Niro”, më 1 maj 2016, në orët e mbrëmjes. Viktima u qëllua në tavolinë, ku ndodhej bashkë me një zyrtar të Policisë, një gazetar dhe një mjek, të tre të njohur të tij.
Ngjarja
Të dy të pandehurit kanë qenë në shoqërinë e njëri-tjetrit në automjetin e të pandehurit Renato Milloshi. Pikërisht kur të dy të pandehurit kanë qënë ndodhur në vendin e quajtur Rruga “Avdyl Frashëri” në kryeqytet në afërsi të Librit Universitar, ata kanë parë shtetasin Marenglen Abedini, i njohur për të dy të pandehurit, pasi sipas organit të akuzës ky shtetas para disa kohësh ka patur një lidhje të afërt me të pandehurën Sesilia Egra.
Rezulton nga aktet se në këtë moment kur shtetasi Marenglen Abedini, ka qenë duke hyrë në automjetin e tij, atij i është afruar i pandehuri Renato Milloshi, i cili ka hapur derën e mjetit të tij dhe me një armë sportive të cilën ai e mbante pa leje të organeve kompetente, e ka goditur atë në kokë me qytën e saj, dhe ka tentuar të mos lejojë shtetasin Marenglen Abedini, të largohet duke i marrë çelsat e mjetit të tij.
Pas një përleshje fizike midis të dyve dhe ndërsa të pandehurit Renato Milloshi i bie pistoleta në tokë, shtetasi Marenglen Abedini drejtohet për në mjetin e tij, me qëllim që ti merrte çelsat e tij, ku tashmë atje ndodhej e pandehura Sesilia Egra, pikërisht kjo e fundit ka marrë armën sportive të pandehurit Renato Milloshi dhe duke ja drejtuar atë shtetasit Marenglen Abedini me armën në pozicion qitje e ka kërcënuar atë me shprehjet “…Largohu… largohu…!”.
Pas kësaj ngjarje të dy të pandehurit Sesilia Egra dhe i pandehuri Renato Milloshi,janë larguar ndërsa në vend ngjarje kanë mbërritur forcat policore ku midis veprimeve të para hetimore dhe proçeduriale, kanë konstatuar të hedhur në tokë pistoletën me mbishkrimin “Erma” së bashku me 4 fishekë të cilën e kanë sekuestruar.
