Pas më shumë se dy javë nga akuzat e rënda të bëra publike, Prokuroria e Krimeve të Rënda ka dalë tashmë me një version zyrtar të saj duke i kërkuar Kuvendit të Shqipërisë që të arrestohen deputetët Tom Doshi dhe Mark Frroku.
Bazuar në komunikatën e Prokurorisë, bëhet e ditur se dy deputetët janë nën akuzë për 3 vepra penale, konkretisht për “Kallzimi i rremë”, “Kanosja për deklarime a dëshmi, ekspertim ose përkthim të rremë”, dhe “Deklaratat e rreme përpara Prokurorit”.
Pavarësisht pretendimeve të Doshit, Prokuroria e Përgjithshme thekson se nga hetimet e kryera është arritur në përfundim se e gjitha kjo ka qenë një histori e sajuar duke akuzuar kështu si deputetin shkodran ashtu edhe Frrokun për kallëzim të rremë.
Madje organi i akuzës nënvizon se e gjithë kjo histori është inskenuar nga tre persona, konkretisht nga deputetët Doshi dhe Frroku dhe Durim Bami, i pretenduar si atentator nga Doshi.
“Në asnjërën prej provave të grumbulluara deri në këtë fazë të hetimeve, nuk rezultoi ndonjë e dhënë konkrete dhe e besueshme për organizimin e vrasjes së Tom Doshit, e mbetur në tentativë. Nga ana tjetër, organi procedues, në bazë të provave dhe fakteve të mbledhura nga hetimi, ka arritur në përfundimin se kjo ngjarje është inskenuar nga shtetasit Tom Doshi, Mark Frroku dhe Durim Bami.” thuhet në njoftimin e Prokurorisë
Në këtë mënyrë, Prokuroria e Përgjithshme i ka dorëzuar kërkesën për heqjen e imunitetit dhe autorizimin e arrestimin e deputetëve Doshi dhe Frroku.
Në bazë të Kodit Penal dy deputetët së bashku me Bamin rrezikojnë deri në 9 vite burg për akuzat e mësipërme. Ndërkohë burime nga prokuroria bëjnë të ditur për A1 Report se Bami do t’i ndryshohet akuza e “Vrasjes se mbetur ne tentative” per te cilen ai mbahet ne burg.
Ora 14:44 Doshi: Nuk jam në dijeni, çështja në hetim
I kontaktuar me telefon nga televizioni A1 Report deputeti i përjashtuar nga Partia Socialiste Tom Doshi është shprehur se nuk ka dijeni për kërkesën e bërë nga Prokuroria karshi kuvendit.Doshi është shprehur se këtë e ka marrë vesh vetëm përmes mediave, ndërsa shton se çështja e akuzave të tij është ende nën hetim.
“Nuk jam në dijeni të një kërkese të tillë, e mora vesh nga mediat. Çështja është nën hetim ende.” është shprehur Doshi
Ora 14:38 Ndryshon edhe akuza për Durim Bamin
Burime nga Prokuroria e Përgjithshme bëjnë të ditur se tashmë me kërkesën e paraqitur nga organi i akuzës, do të ndryshojë edhe akuza ndaj Durim Bamit nga “vrasje e mbetur në tentativë” në “kallëzim i rremë”.
Ora 14:35 Prokuroria rrëzon dy kërkesat e Doshit
Çështja Doshi nuk do të ketë prokurorë të huaj por gjithashtu as nuk do të merret në pyetje kryeprokurori Adriatik Llalla. Ky është vendimi që ka marrë ditën e sotme Prokuroria e Përgjithshme duke rrëzuar kështu këto dy kërkesa të paraqitura nga deputeti Tom Doshi, lidhur me pretendimin e bërë publik prej tij se ka pasur një skenar për eliminimin fizik të tij.
Ora 14:15 Njofti i plotë i Prokurorisë së Përgjithshme
Prokuroria e Përgjithshme kërkon nga Kuvendi i Republikës së Shqipërisë autorizimin për arrestimin e deputetevë të Kuvendit të Shqipërisë, Tom Doshi dhe Mark Frroku, bazuar në nenin 73/2 të Kushtetutës së Republikës së Shqipërisë. Dy deputetët janë të dyshuar për konsumimin e elementëve të veprave penale; “Kallzimi i rremë”, “Kanosja për deklarime a dëshmi, ekspertim ose përkthim të rremë”, dhe “Deklaratat e rreme përpara Prokurorit”, parashikuar nga neni 305, 312/a dhe 305/a të Kodit Penal.
Në kërkesën që Prokurori i Përgjithshëm, z. Adriatik Llalla, i dërgon Kuvendit të Shqipërisë, sqarohen argumentat kundër dy deputetëve. Sipas kërkesës, Prokuroria për Krime të Rënda, më datë 03.03.2015, ka regjistruar kryesisht procedimin penal për veprën “Vrasja e funksionareve publike” mbetur në tentativë, të parashikuar nga neni 79/a – 22 i Kodit Penal, në bazë të deklarimeve të deputetit Tom Doshi, i cili ka deklaruar publikisht se ai dispononte prova, sipas të cilave, Kryetari i Kuvendit të Shqipërisë, Ilir Meta, kishte paguar vrasës me pagesë për të eleminuar fizikisht atë dhe një deputet tjetër. Në të njëjtën ditë, Policia Gjyqësore pranë Drejtorisë së Përgjithshme të Policisë së Shtetit ka referuar materialet në ngarkim të shtetasit Durim Bami, i dyshuar për kryerjen e kësaj vepre penale.
Në kuadër të hetimeve për këtë procedim penal, janë pyetur persona që mund të kenë pasur dijeni për rrethanat e ngjarjes, përfshirë edhe disa zyrtarë të lartë dhe deputetë të Kuvendit të Shqipërisë.
Nga tërësia e veprimeve hetimore, kriijohen dyshime të arsyeshme se ngjarja e kallëzuar publikisht nga ana e deputetit Doshit, dhe e pohuar prej tij para organit procedues, ka qenë e sajuar. Në asnjërën prej provave të grumbulluara deri në këtë fazë të hetimeve, nuk rezultoi ndonjë e dhënë konkrete dhe e besueshme për organizimin e vrasjes së Tom Doshit, e mbetur në tentativë.
Nga ana tjetër, organi procedues, në bazë të provave dhe fakteve të mbledhura nga hetimi, ka arritur në përfundimin se kjo ngjarje është inskenuar nga shtetasit Tom Doshi, Mark Frroku dhe Durim Bami.
Prokuroria për Krime të Rënda, pasi ka arritur në konkluzionin se ngjarja është inskenuar nga ana e shtetasve Tom Doshi dhe Mark Frroku, ia ka kaluar hetimin për kompetencë Prokurorisë së Përgjithshme, e cila ka tagrin ligjor për hetimin e zyrtarëve me funksion “deputet”. Në analizën që i është bërë materialit hetimor pranë Prokurorisë së Përgjithshme, është konkluduar se dy deputetët dyshohet se kanë konsumuar elementët e veprave penale; “Kallzimi i rremë”, “Kanosja për deklarime a deshmi, ekspertim ose përkthim të rremë”, dhe “Deklaratat e rreme përpara Prokurorit”
