Në sajë të operacionit të koduar “Shtegtari”, policia e shtetit ka bërë të mundur prangosjen e tre shtatasve, të cilët në bashkëpunim, kanë vrarë inspektorin e policisë Roland Likaj.
Zv. drejtori i Policisë së Shtetit Agron Kuliçaj, në një deklaratë për shtyp tha se janë arrestuar Jetnor Xhevahir Nakoleci, 25 vjec, lindur në Korçë e banues në Tiranë.
Saleo Arben Stojani, 18 vjec, lindur e banues në Korçë, i dënuar më parë për veprën penale të vjedhjes, i arrestuar me datë 15 dhjetor 2010 për një sërë vjedhjesh të kryera në bashkëpunim në Qarkun e Korçës dhe aktualisht vuan dënimin prej 20 muajsh burgim për këto vepra penale. Personi i trete eshte me iniciale E.Z, 17 vjec, lindur në Elbasan dhe banues në Korçë.
Këta shtetas akuzohen se në bashkëpunim me njëri-tjetrin në datë 18 tetor 2010, rreth orës 02.30 ne lagjen “1 Maji” Vlore, kanë vrarë me armë zjarri pistoletë, në krye të detyrës, nënkomisarin e policisë Roland Likaj.
Zbardhja dhe dokumentimi i plotë ligjor i kësaj ngjarje u bë i mundur në sajë të një pune intensive informative-gjurmuese dhe hetimore të Drejtorisë kundër Krimeve të Rënda në Policinë e Shtetit në bashkëpunim me Drejtoritë e Policisë së Qarqeve Korçë, Vlorë dhe Tiranë.
Ky operacion u realizua në bashkëpunim të ngushtë me Prokurorinë për Krime të Rënda.
Materialet proceduriale i kanë kaluar kësaj Prokurorie për veprat penale të “Vrasjes në rrethana të tjera cilësuese të kryer në bashkëpunim” dhe “Armëmbajtjes pa leje”.
