Ka qenë një pasdite e veçantë, që do të shënohet në kalendarin e jetës të moderatores së njohur të “Tv Klan”, Sonila Meço. Të premten pasdite, rreth orës 18:00, ajo solli në jetë fëmijën e saj të shumëpritur, beben e saj të parë, një vajzë që e ka pagëzuar me emrin Amaris. Fëmija e Sonilës dhe bashkëshortit të saj, Drini Jasa, erdhi në jetë në maternitetin “Mbretëresha Geraldinë” në Tiranë, nën kujdesin e Dr. Halim Kosova dhe nën një përkujdesjeje të veçantë të stafit të maternitetit. Bebja që sapo ka ardhur në jetë, gëzon shëndet të mirë, dhe peshon 3 kg e 30 gr. Ajo që ka bërë përshtypje, ka qenë gjatësia e bebes, 50 cm, që me sa duket i ngjan nënës, pasi Sonila njihet për shtatlartësinë e saj. Në emocionet e para të paslindjes, Sonila ka pohuar për gazetën “Panorama” se ndiheshin në qiellin e shtatë ajo dhe Drini, e bashkë me ta, prindërit e të dyve, pasi në familjet e tyre ardhja në jetë e bebes së parë të Sonilës dhe Drinit ka qenë pritja e gëzuar e fëmijës së shumëpritur. Sonila ka bërë një lindje me operacion (anestezi lokale), edhe pse deri në javën e 40-të ishte parashikuar për lindje natyrale.
Ndërkohë, në orët e para të qëndrimit të saj në maternitet s’kanë reshtur vizitat, lulet nga miqtë, dhe telefonatat e mesazhet në telefonin e saj celular, duke i uruar jetë të gjatë për Amaris. Pyetjes se si po ndihet në këto orë të para të ardhjes në jetë të vajzës ajo i përgjigjet se “Jam shumë e lumtur dhe tashmë kam shuar një kuriozitet për të parë portretin e saj, që duket se është kopja absolute e Drinit, dhe kjo ishte ajo çfarë unë prisja e dëshiroja”, pohon ajo. Për sa i përket emrit Amaris, ajo ka treguar se “Në hulumtimin e gjatë të emrave që kisha menduar për vajzën time, më tingëlloi i mirë Amaris, që është një emër me origjinë hebraike, dhe që ka kuptimin e të dërguarës së Perëndisë”. Ka qenë një vendim i përbashkët për vendosjen e emrit, së bashku me Drinin, i cili po ashtu ka asistuar në lindjen e vajzës. Nuk dihet se kur do t’i rikthehet ekranit të “Tv Klan” Sonila Meço, ndërkohë që në maternitet do të vazhdojë të qëndrojë dhe dy ditë të tjera. Deri në ditët e fundit të lindjes, Sonila u shfaq në publik me një trup totalisht në formë, pavarësisht faktit që ishte në muajin e nëntë të shtatzënisë. Kështu që nuk do të jetë çudi që pas rikthimit të saj në ekran, të shfaqet me të njëjtat linja elegante të trupit, njësoj si para shtatzënisë.
