Nata e dytë e Ligës së Kampioneve ka dhu ruar goleada. Kështu, Bajern Mynih dhe Paris SG kanë fituar nga 5-0 ndeshjet e tyre, duke marrë pikët e plota në tri ndeshjet e zhvilluara. Edhe gjermanët e Leverkusenit kanë shkatërruar 4-0 ekipin e Shakhtarit. Ndërsa Gallatasaraj, pasi ka shënuar 3 gola në pjesën e parë, është kënaqur me kaq. E vetmja surprizë, nëse mund të themi kështu, ishte barazimi 1-1 i Benfikës ndaj Olimpiakosit, në një fushë të mbushur me ujë. Ndërsa supersfida Real-Juventus përfundon me fitoren e spanjollëve. Kristiano Ronaldo bëhet sërish protagonist, që me dygolëshin e shënuar, ngjitet në kuotën e 7 golave në 3 ndeshje, si asnjë tjetër. Mançester Junajtid ka vuajtur jo pak ndaj Sociedadit, teksa ka marrë 3 pikët vetëm me një autogol, edhe pse ka humbur shumë raste shënimi.
MILAN-BARÇA
Si gjithnjë karizmatik me deklaratat e tij, Adriano Galiani nuk e ka pranuar ende pas ndeshjes rastin e shpërdoruar nga Robinjo. “Nuk e di nëse e la topin vetë duke bërë finte, apo nuk e gjuajti dot. Nëse e pyes, e di që do më thotë një gënjeshtër, gjithsesi, jam i bindur që do më lërë pa gjumë. Ishte një rast i shkëlqyer për të kaluar në avantazh. Bravo Alegrit për skemën 4-3-3, pasi rezultoi shumë efikase. Kaka u sakrifikua në fushë, duke menduar edhe për mbrojtjen. Ishte një modul loje ku të gjithë duhet të sakrifikonin”, – deklaroi Galiani. Ndërsa Andres Iniesta mendon se skuadra e tij duhet të kishte fituar, por nuk ka dyshime që do të kualifikohen si të parët e grupit, kur thotë: “Milani u mbrojt me të gjitha forcat, por gjithsesi ne i patëm rastet për shënim dhe për ta fituar ndeshjen. Nuk shqetësohem, nëse ky barazim na penalizon për t’u kualifikuar si kryesues, pasi jam i bindur që italianët do të dalin pa pikë kur të luajnë në fushë tonë”.
DORTMUND
Pas fitores 2-1 kundër Arsenalit, me një koreografi mbresëlënëse në Londër, tifozët e Borusias së Dortmundit tashmë besojnë se ky ekip mund të shkojë sërish në finalen e Champions League, edhe pse është një rrugë e gjatë dhe e vështirë deri atje. Pas humbjes në Napoli, shumë analistë menduan se kaq ishte cikli i Dortmundit në këtë kompeticion, por verdhezinjtë u rikthyen të frikshëm pas dy fitoreve rresht. Sfida me Napolin do të jetë vendimtare sa i përket kualifikimit, por Dortmundi kërkon kreun e grupit, teksa i pret brenda, si Napolin, ashtu edhe Arsenalin, pasi Marseja nuk përbën problem, edhe pse është një transfertë, ngaqë nuk ka asnjë pikë pas tri pikëve dhe është dorëzuar tashmë.
- Advertisement -
