Një krim i rëndë ndodhi sot paradite, kur bashkëshorti goditi me thikë gruan e tij në mes të rrugës. Ngjarja u shënua në rrugën “Tefta Tashko”, pas shkollës ‘Ismail Qemali’ rreth orës 10:00 .
Viktima është Valbona Çarçani.
Pas krimit autori Genci Çarçani ka tentuar të largohet por është arrestuar nga policia.
Çifti kishte vite që kishte jetuar në Udine të Italisë por kohët e fundit jetonin në një banesë në rrugën “Mine Peza”.
Dëshmitarë nga vendi i ngjarjes thonë se mes çiftit ka pasur një konflikt verbal dhe më pas bashkëshorti e ka goditur 3 herë me thikë, duke i shkaktuar vdekjen e menjëhershme.
Prokuroria e Krimeve të Rënda mori nën hetim vrasjen. Pista e parë e hetimit është ajo e vrasjes për shkak të xhelozisë.
